Сэһэҥҥэ революция кэмигэр саха норуотун ыар олоҕо-дьаһаҕа көстөр, сүрүн герой – Хаппытыан Чолбооноп. Кини төрөөбүт-үөскээбит өтөҕө Уоттаах Алыыта, ыал мааны оҕото этэ, оттон хамначчыт буолаахтыыр, эдэр кинээскэ Мэппиэдийгэ оттуур. Балта эмиэ ыалга хамначчыт, бурдук быһааччы. Соҕотох Дьэбдьэкиэйэ диэн ийэлээхтэр. Хаппытыан ис-иһиттэн тугу барытын сабардаабыт баһылыктарга абарар. Хайдах эмэ гынан кинилэр эмиэ дьоннорун, хамначчыт туох да атына суоҕун өйдөтөр суолу булуон баҕарар.
Уол аҕатын орто дойдуга ордубут бэлиэтин, хааннаах баппыыскатын атыыһыт Сахаар былдьаан сылдьар. Ампаары алдьатан ол хааннаах хабалалаах кумааҕыны булан ылар уонна уоран чэй, табах аҕалан отчуттарга түҥэтэр.
Хаппытыан Туорай Ньукулай кыыһын Татыйыгы таптыыр, бииргэ ыал буолан олоруон олус баҕарар. Туорай Ньукулай барыыска хараҥарбыт, байар-тайар эрэ санаалаах киһи, кини уолу сөбүлээбэт. Ол иһин Хаппытыаны тыллаан биэрэр ампаары алдьатан, баайын-дуолун дьадаҥыларга түҥэппитин. Хаппытыан хаайыыга барар.
Муҥурун булларбатах буруй сыллар ааһаллар, хаайыыга хаста да киирэр балыллан, көмүс хостуур бириискэҕэ, шахтаҕа да үлэлиир. Ол тухары Татыйыгын умнубат. Ыаҕайа Ылдьааҕа тохтоон ааһар, Балбаара эмээхсинтэн соҕотох таптала Татыйыга бу сиртэн күрэммитин, суох буолбутун истэр.
Хаппытыан дойдутугар эргиллэр, кини былаас, дьон-норуот дьыалатыгар сылдьар соруктаах. Партия сорудаҕынан, Совет былааһынан, революция туһунан дьону өйдөтүөхтээх, сотору Кыайыы буоларын.
Уонтан тахса сыл тухары Советскай былааһы ылымматахтары, былааска утары барбыттары эккирэтиигэ, кинилэр таһаарар алдьархайдарын чөлүгэр түһэрэр, саҥалыы иһин дьулуһар. Уоттаах сэриилэргэ кииртэлээбитэ да элбэх. Кини хараҥаны кыайан дьон-норуот дьолун туһугар охсуспут киһи.
Хаппытыан Чолбооноп киэҥ аартыкка улахан хардыытытан нэһилиэгэр дьону үөрэхтээх оҥороору, сырдыкка уһуйаары саҥа оскуола туттаран олоххо киллэриитэ буолар. Үөрэх дыбарыаһын оҕолорго анаан айбытын иһин, олохтоохтортон киэҥ биһирэбили, хайҕалы, махталы ылар.

Кинигэ ис хоһоонун кылгастык кэпсээтэ вед. библиотекарь Нария Васильева, СӨ национальнай библиотеката, Оҕо ааҕар киинэ